القلم ریسرچ لائبریری پروجیکٹ میں ہمارا ساتھ دیں ! القلم ریسرچ لائبریری کے رضاکار بنیں !!

Showing posts with label کھلا خط بنام مرزا مسرور احمد. Show all posts
Showing posts with label کھلا خط بنام مرزا مسرور احمد. Show all posts

Thursday, August 27, 2009

کھلا خط بنام مرزا مسرور احمد - حصہ سوئم

اب میرے دل میں سوال یہ پیدا ہوتے ہیں:۔

1) مرزا صاحب نے اپنی معرکۃ الآراء تصنیف میں جو کہ خدا تعالےٰ نے اپنی حفاظت، اور اہتمام میں نہایت تحقیق اور دقیق، کے ساتھ مولف کو ملہم ، مجدد اور مامور کے درجہ پر فائز کر کے لکھوائی اس میں الہاماً ایسا متفقہ عقیدہ بابت حیات عیسیٰ علیہ اسلام لکھوایا جو کہ 13صدیوںسے امت کا ، اولیاء کا ، صلحاء کا عقیدہ تھا۔کیاوہ عقیدہ صحیح نہیں تھا؟

2) یااس تحریر کے بارہ برس کے بعد مرزا صاحب نے ایک سو اسی ڈگری کا پھیر کھا کر بغیر کسی ثبوت کے ( نام نہادثبوت بعد میں ڈھونڈے گئے) مسلم امہ کے متفقہ عقیدہ کی نفی کرتے ہوئے، وفات عیسیٰ علیہ سلام کا جو عقیدہ بیان کیا وہ صحیح ہے؟ کیا پہلا عقیدہ براہین احمدیہ والا اب اتمام حجت نہیں رہا؟

3) دونوں الہاموں میں سے کونسا الہام صحیح ہے؟ وہ الہام جو کہ رسول کریم اور صحابہ ، اولیاء، صلحاء، اور امت کے عقیدہ کے مطابق تھا یا وہ الہام جو کہ بالکل مخالف سمت میں تھا؟

4) مرزا صاحب فرماتے ہیں کہ شریف آدمی کے کلام میں تناقض نہیں ہوتا، تو کیا خدا تعالےٰ (نعوذ باللہ) شریف آدمی سے بھی گیا گزرا ہے جس کے الہامات میں اتنا زیادہ تناقض ہے کہ 1880 میں تو عیسیٰ علیہ سلام کی زندگی کا الہام کرتا ہے اور 1891 میں ان کی وفات کا الہام کرتا ہے؟

5) وہ کتاب جس کا متولی اور مہتمم خود خدا تعالےٰ ہو اس میں محض گپ لکھوائی تھی خدا تعالےٰ نے اپنے مجدد سے ؟

6) وہ کتاب جس کو خدا تعالیٰ نے اپنے مامور سے الہام کر کے، نہایت تحقیق، عمیق کے اصل ماہیت کے باریک دقیقہ سے تہہ کو کھلوا کر لکھوائی اسمیں شرک عظیم ہی لکھوانا تھا، جیسا کہ مرزا صاحب نے فرمایا ہے کہ حیات عیسیٰ کا عقیدہ شرک عظیم ہے؟

7) اگر یہ عقیدہ گپ ہے تو کیا مرزا صاحب نے بطور مجدد لوگوں کو، اسلام کی حقانیت اور معارف قرآن کے نام پر گپ پڑھنے کو دی؟

8) اگر یہ عقیدہ شرک عظیم ہے تو کیا مرزا صاحب بطور مامور من اللہ لوگوں کومضبوط اور مستحکم دلائل کی آڑ میں شرک کی تعلیم بیچتے رہے؟

9) کیا رسول اکرم صلی اللہ علیہ وسلم، خلفائے راشدین رضی اللہ عنہم، صحابہ کرام رضی اللہ عنہم ، اولیاء، تیرہ صدیوں کے مجددین، صلحاء اور تیرہ صدیوں کی امت ،سب کے سب گپ پر یقین کرتے ہوئے شرک میں (نعوذباللہ) مبتلا تھے؟

10) یا اپنی کتاب کی فروخت بڑھانے کے لئے سب ڈرامہ تھا ؟یا خدا ،رسول،قرآن کے نام پرلاشعوری دکانداری تھی؟

11) یہ کیسے ممکن ہے کہ ایک مجدد بارہ سال تک شرک لکھ کر اسکی اصلاح بھی نہیں کرتا ، حالانکہ مرزا صاحب کا دعویٰ ہے کہ خدا تعالےٰ مجھے ایک لمحہ بھی غلطی پر قائم نہیں رہنے دیتا، یا انکا لمحہ بارہ برس پر محیط ہوتا تھا؟ یا خدا تعالےٰ ( نعوذ باللہ) بھول گیا تھا مرزا صاحب کی غلطی درست کرنا؟

12) کیا ایسا تو نہیں کہ مرزا صاحب کا پہلے عقیدہ اور جو کچھ انہوں نے براہین احمدیہ میں لکھا ہے ،بالکل صحیح ہو اور جب 1888میں بشیر اول کی وفات کے چند دن بعد ہسٹیریا کے دورے پڑنے شروع ہوئے( بحوالہ رویت نمبر19، سیرۃ المہدی جلد۱، مصنفہ مرزا بشیر احمد صاحب) ، انکی وجہ سے موقع پا کر الہامات میں شیطان داخل ہو گیا ہو جیسا کہ سورۃ الحج میں لکھا ہے کہ بعض دفعہ شیطان وحی میں مداخلت کر دیتا ہے، اور مرزا صاحب بھٹک گئے ہوں اور بوجہ اپنی مختلف بیماریوں، بالخصوص مراق اور مالیخولیا وغیرہ کی وجہ سے شیطانی اور رحمانی الہامات میں فرق نہ کر سکے ہوں؟

اور آپ دیکھ لیں کہ مرزا صاحب نے اسکے بعد اپنے دعووں میں ترقی کرنی شروع کر دی اور جیسا کہ انہوں نے اپنی کتاب’’ تحفہ گولڑویہ‘‘ ، صفحہ 232 پر لکھا ہے ،" دجال کا حدیثوں میں ذکر پایا جاتا ہے وہ پہلے نبوت کا دعویٰ کریگا اور پھر خدائی کا دعویدار بن جائیگا"، کے مطابق ،حتیٰ کہ خدائی کے دعویٰ ( حوالہ کیلئے کتاب البریہ، صفحہ 103 تا 105، رخ جلد 13) تک پہنچے۔ اور پیچھے پلٹ کر نہیں دیکھا۔

مرزا صاحب کو خدا تعالےٰ سمجھانے کے لئے اس کے بعد بھی کبھی کبھار صحیح الہام سے نوازتا رہا ، کم از کم یہ الہام تو بالکل ان کے حسب حال اور صحیح لگتا ہے، " وہ کام جو تم نے کیا خدا کی مرضی کے موافق نہیں ہو گا " ، { بحوالہ حقیقۃ الوحی ، صفحہ 108، رخ جلد22 }۔

میرے محترم ہم وطن، میں آپ کو اس خدا کی طرف بلاتا ہوں ، جسکی محمد صلی اللہ علیہ وسلم نے ہمیں راہ دکھائی ہے اور جس راہ سے بد قسمتی سے آپ کے پردادا جان نے لوگوں کو ( شایدلا شعوری طور پر)بھٹکایا ہے۔

یہ دنیا چند روزہ ہے، لیکن اصل اور ہمیشہ کی زندگی آگے کی ہے اسکا فکر کرتے ہوئے ، کفریہ عقائد کو لات مارئے اور محمد صلی اللہ علیہ وسلم کی اصلی غلامی میں آ جائیں، اللہ تعالےٰ آپکو اس مصنوعی عزت کے بدلے اصل عزت سے اتنا زیادہ نوازے گا کہ آپ اندازہ نہیں کر سکتے، اور آپکے خوف کو ( جو ہر وقت انسانی حفاظتی حصار میں قید رہتے ہیں) امن اور آزادی میں بدل دیگا۔اللہ تعالےٰ آپکو حق اور جو دوسرے بھی اس خط کو پڑھیں ، ہدایت سے نوازے۔آمین۔ کیا میں آپ جناب سے جواب کی امید رکھوں؟

اگر خدا تعالےٰ نے توفیق دی تو میں ختم نبوت کے پہلو پر بھی آپ سے مرزا صاحب کے حوالوں کے ساتھ غور کرنے کی دوبارہ درخواست کرونگا۔

-

میں ہوں آپکا مخلص و ہمدرد

شیخ راحیل احمد {سابق احمدی}

2004 May 13

کھلا خط بنام مرزا مسرور احمد - حصہ دوئم

میرے محترم ، جب ہم اوپر کے حوالوں کو دیکھیں تو صورت یہ بنتی ہے کہ براہین احمدیہ ایک ایسی کتاب ہے جو اپنے تین سو قوی دلائل کے ساتھ اسلام اور قرآن کی حقانیت و صداقت کی ضامن ہے اور یہ کتاب خدا تعالےٰ نے خود خفی اسرار کھول کر مرزا غلام احمد صاحب سے بطور ملہم، مامور و مجدد کے لکھوائی ہے اور مولف کو اس کتاب کی صحت اور صداقت پر اتنایقین ہے کہ اس نے ان دلائل کے توڑ کرنے والے کے لئے دس ہزار روپے کا انعام بھی رکھ دیا ہے ، اس مضبوط کتاب پر رسول کریم صلی اللہ علیہ وسلم نے بھی خواب میں آ کر خوشی اور رضا مندی کا اظہار کیا ہے، اور اس کتاب میں مصنف نے خدا کے سکھائے ہوئے اسرار و حقائق کے نتیجے میں حیات مسیح کا اقرار کیا ہے۔لیکن آج جماعت وفات مسیح کی موید ہے۔

فاضل مصنف فرماتے ہیں، " ھو الذی ارسل رسولہ با لھدیٰ و دین الحق لیظھرہ ُعلیٰ الدین کلہِ :۔ یہ آیت جسمانی اور سیاست ملکی کے طور پر حضرت مسیح کے حق میں پیشگوئی ہے اور جس غلبہ کاملہ دین اسلام کا وعدہ دیا گیا ہے کہ وہ غلبہ حضرت مسیح کے ذریعے ظہور میں آئے گا اور جب حضرت مسیح دوبارہ اس دنیا میں تشریف لائیں گے تو ان کے ہاتھ سے دین اسلام جمیع آفاق اور اقطار میں پھیل جائے گا........حضرت مسیح پیش گوئی متذکرہ بالا کا ظاہری اور جسمانی طور پر مصداق ہے"

{ بحوالہ براہین احمدیہ حصہ چہارم ، صفحہ593، رخ جلد1}۔

اس میں واضح طور پر مرزا غلام احمد صاحب حضرت عیسیٰ علیہ السلام کے دنیا میں آنے کا اقرار کر رہے ہیں ، حوالے اور بھی ہیں مگر اس جگہ مقصد بحث نہیں بلکہ حق کی طرف بلانا ہے۔آئیے دیکھیں کہ کیا میں مطلب صحیح سمجھا ہوں ، مرزا صاحب اپنی دوسری کتاب میں لکھتے ہیں۔

" میں نے براہین احمدیہ میں جو کچھ مسیح بن مریم کے دوبارہ دنیا میں آنے کا ذکر لکھا ہے، وہ ذکر صرف ایک مشہور عقیدہ کے لحاظ سے ہے جس کی طرف آجکل ہمارے مسلمان بھائیوں کے خیالات جھکے ہوئے ہیں سو اسی ظاہری اعتقاد سے میں نے لکھ دیا تھا..........لیکن جب مسیح آئے گا تو اس کی ظاہری اور جسمانی طور پر خلافت ہو گی۔

یہ بیان جو براہین میں درج ہو چکا ہے صرف اس سر سری پیروی کی وجہ سے ہے"۔{ بحوالہ ازالہ اوہام، صفحہ 196، رخ جلد3 }۔ یعنی یہ اقتباس تصدیق کرتا ہے کہ مرزا غلام احمد صاحب نے بھی براہین احمدیہ میں اپنے عقیدہ کے طور پر مسلمانوں کا 1300 سالہ عقیدہ کہ حضرت عیسیٰ علیہ السلام زندہ ہیں اور دوبارہ تشریف لائیں گے، کو بطور آثار مرویہ نبی الزمان صلی اللہ علیہ وسلم کے درج کیا ہے۔

اور کیا یہ عقیدہ واقعی متفقہ عقیدہ تھا اس بارے میں ، میں آپکے پیشرو یعنی کہ خلیفہ ثانی ، جو کہ پسر موعود بھی کہلاتے ہیں مرزا بشیرالدین محمود احمد صاحب کا ایک حوالہ پیش کرتا ہوں فرماتے ہیں،

" پچھلی صدیوں کے سب مسلمانوں میں مسیح کے زندہ ہونے پر ایمان رکھا جاتا ہے اور بڑے بڑے بزرگ اس عقیدہ پر فوت ہوئے.............حضرت مسیح موعود ( مرزا غلام احمد صاحب )سے پہلے جس قدر اولیاء اور صلحاء گذرے ان میں ایک بڑا گروہ عام عقیدہ کے ماتحت حضرت مسیح علیہ السلام کو زندہ خیال کرتا تھا"۔ { بحوالہ حقیقۃ النبوۃ، صفحہ 142، مصنفہ مرزا بشیرالدین محمود احمد صاحب }

مرزا غلام احمد صاحب اور ان کے پسر موعود کے ان حوالوں کو جو اب تک میں نے پیش کئے ہیں سے مندرجہ ذیل نتائج نکلتے ہیں

۱) براہین احمدیہ خدا کے کھولے ہوئے اسرار و حقائق کے تحت لکھی گئی جسکا ظاہراً و باطناً خدا خود ذمہ دار ہے،اور ہر لکھی ہوئی بات اتمام حجت ہے!

۲) مرزا صاحب نے اس میں ، حیات مسیح بن مریم کے بارہ میں اپنے عقیدہ کا اظہار، صحابہ کبار رضی اللہ عنہم ،اولیاء کرام ، صلحائے کرام اور عام مسلمانوں کے تیرہ سو سالوں کے عقیدہ کے مطابق کیا ہے۔

اب ہوتا کیا ہے کہ مرزا صاحب12سال تک اس عقیدہ کی اشاعت کرتے ہیں ، پھر اپنی کتاب’’ توضیح مرام‘‘ میں 92-1891 میں دعوی کرتے ہیں کہ خدا تعالےٰ نے ان پر بارش کی طرح الہامات کر کے بتایا ہے کہ قرآن کریم میں تین جگہ سے حضرت عیسیٰ علیہ السلام کی وفات ثابت ہوتی ہے اوراگلی کتاب" ازالہ اوہام "میں یہ تیس جگہ بن گئی، کس طرح دعووں میں ترقی کرتے ہیں ، انکے ذکر کا یہ موقع و محل نہیں اب جو انتہائی اہم سوالات پیدا ہوتے ہیں، میں ان پر بعد میں آتا ہوں ، اس سے قبل ایک دو نہایت اہم حوالہ جات پیش کرنا چاہتا ہوں، جناب مرزا غلام احمد صاحب فرماتے ہیں،" ہم ثابت کر چکے ہیں کہ حضرت عیسیٰ علیہ السلام کا زندہ آسمان پر جانا محض گپ ہے۔" { بحوالہ براہین احمدیہ حصہ پنجم، صفحہ 262، رخ جلد 12}۔
-
اور دوسری جگہ لکھتے ہیں، " فمن سوع الادب ان یقال ان عیسیٰ ما مات ان ھوا لاشرک عظیم یا کل الحسنات۔ ترجمہ:۔ سو من جملہ سوادب کے ہے کہ یہ کہا جائے کہ عیسیٰ مرا نہیں ، یہ تو نرا شرک عظیم ہے۔ جو نیکیوں کو کھا جاتا ہے،" { بحوالہ الا ستفتاء ، صفحہ 660، رخ جلد22 }

کھلا خط بنام مرزا مسرور احمد

بسم اللہ الرّحمٰنِ الرَّ حِیم ۔ نحمدُ ہ‘ وِ نُصَلِیّ علیٰ رسُولِہِ الکریم

کھُلا خط

منجانب شیخ راحیل احمد ________ بنام _________ جناب مرزا مسرور احمد صاحب

سابق احمدی، سکنہ ربوہ، (حال مقیم) جرمنی ____ خلیفہ و مرکزی سر براہ انٹر نیشنل جماعت احمدیہ، لندن

السلام

جناب ، آپ نے اس عاجز کا نام تو سنا ہوا ہے ، مجھے صحیح طرح علم نہیں کہ آپکے عہدیداران نے آپکے سامنے میری کیاتصویر پیش کی ہے لیکن میں چونکہ اس نظام کا پچاس سال سے زیادہ ایک فعال حصہ رہا ہوں جسکی اب آپ سر براہی کر رہے ہیں اس لئے اندازہ کر سکتا ہوں کہ آپکے سامنے میری تصویر ایک بھیانک قسم کے دشمن کے طور پر پیش کی گئی ہو گی، لیکن میں آپ کو اس کھلے خط کے ذریعہ واضح کرنا چاہتا ہوں کہ میں نہ تو آپکا اور نہ ہی جماعت احمدیہ کادشمن ہوں، بلکہ میں آپ لوگوں کا اللہ کی خاطرہمدرد اورمخلص ہوں اور میرا یہ خط اسی خلوص کا مظہر ہے۔

میں صرف مرزا غلام احمد صاحب کے ان خیالات و عقائدسے جو اسلام کی اصل تعلیم کے خلاف ہیں، اختلاف کرتا ہوں اور آپ کی جماعت میں شامل اپنے عزیزوں اور دوستوں کی محبت سے مجبور ہو کر ان کو دیانتداری سے ان کفریہ اور توہین رسول صلی اللہ علیہ وسلم والے خیالات سے بچانا چاہتا ہوں۔اور آپ کو بھی یہ چند سطور لکھنے کی وجہ قران کریم کے اس حکم کے تعمیل ہے، کہ دوسروں کو نیکی کی طرف بلاو ، کیونکہ ہم دونوں ایک ہی شہر کے رہنے والے ہیں یعنی کہ چناب نگر ( سابقہ ربوہ) کے، اس لئے آپ کا مجھ پر حق ہے اور میرا فرض ہے کہ میں آپکو اس نیک بات کی طرف بلائوں، جس کا حکم رسول کریم صلی اللہ علیہ وسلم نے خدا کے اذن سے دیا ہے۔

جیسا کہ آپ جانتے ہیں کہ رسول کریم صلی اللہ علیہ وسلم آخری نبی ہیں اورحیات عیسیٰ علیہ السلام، چودہ صدیوں سے مسلمانان عالم کے متفقہ عقائد ہیں ، اور آپ کے پردادا و بانی جماعت احمدیہ مرزا غلام احمد صاحب بھی کم و بیش 52 سال تک ان عقائد سے متفق رہے۔
اور ان کے عقائد میں اس وقت تبدیلی پیدا ہونی شروع ہوئی جب ان کو بشیر اول کی وفات کے کچھ عرصہ بعدہسٹیریا اور مراق وغیرہ کے دورے پڑنے شروع ہوئے خاکسار اس بات کو مرزا غلام احمد صاحب کے اپنی تحریر کے حوالوں سے پیش کرتا ہے۔
مرزا صاحب نے براہین احمدیہ کی پہلی دو جلدیں 1880 میں شائع کیں، تیسری 1882 میں اور چوتھی1884 میں اور پانچویں جلد23 سال کے بعدشائع ہوئی۔اس کتاب (براہین احمدیہ ) کے بارہ میں مرزا غلام احمدصاحب کے دعویٰ جات یہ ہیں:۔( دعوے تو بہت ہیں صرف چند کا ذکر کر رہا ہوں )

1-- " اس عاجز نے ایک کتاب متضمن اثبات حقانیت قرآن و صداقت دین اسلام ایسی تالیف کی ہے جس کے مطالعہ کے بعد طالب حق سے بجز قبولیت اسلام اور کچھ نہ بن پڑے'' ۔ { اشتہار اپریل 1879 ، مجموعہ اشتہارات ج۱/ ص۱۱}

2-- " کتا ب براہین احمدیہ جسکو خدا تعالےٰ کی طرف سے مولف نے ملہم اور مامور ہو کر بغرض اصلاح و تجدید دین تالیف کیا ہے۔..........اول تین سو مضبوط اور قوی دلائل عقلیہ سے جن کی شان و شوکت و قدر و منزلت اس سے ظاہر ہے کہ اگر کوئی مخالف اسلام ان دلائل کو توڑ دے تو اس کو دس ہزار روپے دینے کا اشتہار دیا ہوا ہے۔(ص 23)

اور مصنف کو اس بات کا بھی علم دیا گیا ہے کہ وہ مجدد وقت ہے اور روحانی طور پر اس کے کمالات مسیح بن مریم کے کمالات سے مشابہ ہیں ( ص 24 )

اگر اس اشتہار کے بعد بھی کوئی شخص سچا طالب بن کر اپنی عقدہ کشائی نہ چاہے اور دلی صدق سے حاضر نہ ہو تو ہماری طرف سے اس پر اتمام حجت ہے"۔( ص 25 ) { بحوالہ اشتہار نمبر ۱۱، مجموعہ اشتہارات جلد ۱، صفحہ 23 تا 25 }

3-- " اس پراگندہ وقت میں وہی مناظرہ کی کتاب روحانی جمیعت بخش سکتی ہے کہ جو بذریعہ تحقیق عمیق کے اصل ماہیت کے باریک دقیقہ کی تہہ کو کھولتی ہو''۔ { بحوالہ اشتہار نمبر 16، مجموعہ اشتہارات جلد ۱ ، صفحہ 43 }

4-- "یہ عاجز بھی حضرت ابن عمران کی طرح اپنے خیالات کی شب تاریک میں سفر کر رہا تھا کہ ایک دفعہ پردہ غیب سے اِنی اَ نَا رَبُّکَ آواز آئی اور ایسے اسرار ظاہر ہوئے کہ جن تک عقل اور خیال کی رسائی نہ تھی۔ سو اب اس کتاب کا متولی اورمہتمم ظاہراً و باطناً حضرت رب العالمین ہے۔" { اشتہار نمبر 18، مجموعہ اشتہارات جلد۱، صفحہ 56 }